Gamiton ni Miss Universe Philippines 2022 Celeste Cortesi ang Miss Universe stage agud matib-ong ang iya kawsa para sa mga kabataan.
Suno sa Filipino-Italian beauty queen, madugay na siya nga nagatrabaho kaupod sa isa ka organisasyon nga nagafocus sa pagtapna sang kagutom kag malnutrition sa mga kabataan.
Ginpahayag man sini nga nakadtuan niya ang nagkalain lain nga malayo nga lugar sa Pilipinas kag nabatian ang nagkalain lain nga istorya sang mga kabataan.
Ginpasalig man sini ang pageant fans nga naka-set ang iya pinsar sa korona kag nakahanda siya indi lamang para sa pageant walk kag question-and-answer portion kundi sa tanan nga aspeto.
Ginpakigbahin sini nga apat ka tuig ang iya ginhulat antes siya makaangkon sang maayo nga English speaking skills.
Ini bangud sa Italya siya nagdaku kag nagsaylo lamang sa Pilipinas sang 2018 kag ginpursue ang iya nga karera sa pageants paagi sa pagtiglawas sa Pilipinas sa Miss Earth stage.
Maga-compete si Celeste sa Enero 14, 2023 sa New Orleans, Louisiana, United States.
Kun magdaog si Celeste, siya ang ikalima nga Miss Universe halin sa Pilipinas, sunod kay Catriona Gray nga ginkoronahan sang 2018.
