ILOILO CITY – Ginpaidalom na sa red alert status ang Bureau of Fire Protection subong nga nagahilapit ang paskwa kag bag-ong tuig.
Sa interview sang Bombo Radyo kay Fire Chief Superintendent Atty. Jerry Candido, director sang Bureau of Fire Protection Region VI, iya ginpahayag nga preparado na ang ila equipment kag pasilidad sa tion sang emerhensiya subong nga holiday season.
Ginpasalig ni Candido nga may yara sang bastante nga personnel nga maga-duty sa Christmas eve kag sa New Year’s Eve.
Activated naman ang Oplan Palupok sang ahensya kun sa diin, gina-enganyo ang publiko nga likawan ang paggamit sang palupok bangud nga madamo man sang mga pamaagi sa pagsug-alaw sang bag-ong tuig.
Sa rehiyon, may yara sang 382 tanan nga mga retailers, anum ka manufacturers kag isa ka distibutor sang mga palupok.
Magapangatubang sang nagakaigo nga kaso ang mga madakpan nga naga-engage sang ilegal nga pagbaligya sang firecrackers kag pyrotechnics.
Sa mga christmas lights naman, dapat nga magbakal lang sang may yara sang Import Commodity Clearance ukon sticker.
Dugang pa niya, indi gid pagpabay-an nga nakabukas ang mga kuryente kag kuhaon ini sa saksakan kun wala ginagamit.
