ILOILO CITY – Nagapati ang isa ka sports analyst nga daku ang posibilidad nga makuha sang France ang back-to-back win sa 2022 FIFA World Cup sa Qatar.
Maga-atubangay ang France kag Argentina para sa final match sa Domingo, Disyembre 18, alas-onse sa gab-i oras sa Pilipinas.
Sa interview sang Bombo Radyo kay Coach Karl Lara, iya ginpahayag nga humalin sang pagsugod sang World Cup, ginpakita sang France ang pure dominance.
Magluwas sa young superstar nga si Kylian Mbappé kag kay Olivier Giroud, ang France ang ginabug-usan pa sang mas bata kag manami nga mga players.
Sa latest nga match sang France, na-record nanday Theo Hernandez kag Randal Kolo Muani ang ila first goal subong nga edition sang World Cup.
Sa bahin sang Argentina, suno kay Coach Lara, may yara gid sang tactical adjustment nga himuon ang coach bangud nga pat-ud nga bantayan gid sang maayo ang Argentinian forward kag golden boot race contender nga si Lionel Messi.
Apang balantayan man sa ila team ang 22-anyos nga si Julián Álvarez nga may duha ka goals sa semi-finals match batuk sa Croatia.
Suno pa kay Coach, sa pagtakop sang regulation, may yara gid sang score— 3-1 ukon 2-0 pabor sa France.
Apang kun magdaog man ang Argentina, well-deserved gid nila bangud sa ginpakita nga pagbangon nagikan sa masakit nga kalutusan batuk sa underdog nga Saudi Arabia.
Ang duha ka mga teams ang lunsay may ginadala nga dako nga pressure.
Ang final match ang importante para kay Messi bangud nga ginapahayag nga ini na ang katapusan niya nga World Cup apperance kag wala pa nakakuha sang World Cup title.
Para naman sa France, may pressure man sa ila bahin bangud sila ang defending champion.
Samtang, balantayan man ang match para sa third place sa tunga sang Croatia kag Morocco sa Disyembre 17, alas-onse sa gab-i sa Pilipinas.
