ILOILO CITY – Ipaidalom sa code white alert ang 12 ka mga government-run hospital sa probinsya sang Iloilo umpisa sa Disyembre 24, 2022 bilang pagpanghanda sa ano man nga health related incident nga mahimo magluntad subong nga holiday season.
Sa interview sang Bombo Radyo kay Dr. Paz Calopiz, head sang Hospital Management Office sang probinsya, iya ginpahayag nga natalana siya nga magpagwa sang memorandum nga nagamandu sa tanan nga mga ospital nga mangin handa agud nga gilayon nga makahatag sang insigida nga medical response.
Ang mga ospital sa probinsya pahayag niya ang on-call status agud masiguro ang kahandaan sang mga personnel
Apisar pa nga off duty ang mga personnel, dapat nga naka standby sila sa gihapon ilabi na sa tion nga magdagsa ang pasyente kag kinahanglan ang augmentation.
Ginamanduan man ang mga ospital nga ihanda ang equipment kag supplies ilabi na ang mga bulong kaangay sang anti-tetanus vaccines kag antibiotics para sa firecracker injuries.
Gina-target sang probinsya nga ma-record ang zero firecracker-related casualty sa pagtakup sang tuig tubtob sa una nga mga adlaw sang 2023.
