ILOILO CITY – Gin-dismiss sang Iloilo Provincial Prosecutor’s Office ang kaso nga three counts of murder batuk sa lone survivor sang Estancia massacre nga si Jevron Parohinog kag sa apat ka iban pa nga mga identified suspects kag anum ka mga John Does.
Matandaan nga natabo ang pagpangluthang sa Villa Panian, Estancia, Iloilo sa diin tatlo ka mga mag-abyan ang ginpamatay.
Ang mga biktima amo sanday Chrysler Floyd Fernandez, residente sang Jereos, La Paz, Iloilo City; John Paul “JP” Mark Bosque sang Lopez Jaena Sur, La Paz, Iloilo City; kag Mark Clarenz Libao sang Tacas, Jaro, Iloilo City.
Ang iban pa sa mga ginpasakaan sang kaso amo sanday Jix Parohinog, Michael Porras, Michael Quiatchon, Benzen Llamado, kag anum ka mga John Does.
Sa gina-uyatan sang Bombo Radyo Iloilo nga desisyon ni Assistant Provincial Prosecutor Ronilo Pamonag kag aprubado ni Provincial Prosecutor Ma. Elena M. Hofileña-Gerochi, wala nakitaan sang meritorious ground agud nga magpadayon ang kaso kag magpatigayon sang preliminary investigation.
Napaslawan nga mag-present sang eyewitness ukon ebidensya ang mga complainants nga maka-angut sa mga respondents ukon sa mga ginpasakaan sang kaso sa kamatayon sang tatlo ka mga mag-abyan.
Dugang pa sang Provincial Prosecutor’s Office, sa tion nga ginkuhaan sang pahayag si Jevron Parohinog, wala nasunod ang constitutional requirements.
Ginhimo ini apisar nga wala sang counsel nga naga-assist kay Parohinog.
Sa amo man nga desisyon, ginpahayag sang prosecutor nga ang mga affiants nga sanday Kagawad Rene Barbacion kag security guard nga si Reynante Santiago ang wala direkta nga nakakita sang krimen gani, indi ini makabig nga sufficient evidence.
Bangud nga wala sang nagaka-igo nga ebidensya ang mga complainants, suno sa prosecutor, naghimo sila sang dugang nga mga ebidensya pinaagi sa pagkuha sang pahayag sang pamilya kag kilala sang mga biktima nga nagatudlo nga may yara sang utang ang mag-utod nga Parohinog sa mga biktima.
Mahimo nga makabenepisyo sila sa kamatayon sang mga biktima apang ang proof of motive ang indi maka-establish sang guilt suno pa sa desisyon.
Sa iban nga mga ginpasakaan sang kaso, wala sang mabaskog nga ebidensya nga maka-angut sa ila kahilabtanan.
Dugang pa, ang nagalain-lain nga pahayag ni Jevron Parohinog ang indi makaserbe nga basehan agud nga ma-indict ini.
Indi man klaro kun sa diin natabo ang krimen gani, indi man klaro kun nadala pa ini sa jurisdiction sang prosecution.
Samtang, sang ginpangayu-an sang reaksiyon ang Police Regional Office VI, ginpahayag ni Police Brigadier General Leo Francisco nga wala pa ini nakabaton sang report.
Suno naman sa spokesperson sang Task Group PALIBOSFER nga si Police Major Nestor Bacuyag, iya ginpahayag nga indi pa siya makahatag sang pahayag bangud nga may yara pa sang conference nga ginatambungan.
