ILOILO CITY – Ginalauman nga matapos na sa labing madali nga panahon ang pagbutang sang duha ka span sang girder sa ginakay-o nga Jalaur Bridge sa atubang sang isa ka mall sa Passi City.
Ang pagkay-o sang taytay ang nagresulta sa pagsira sang mayor nga dalan kag pagpatuman sang rerouting nga amo ang isa sa mga rason sang pagpugok sang trapiko apisar nga alas-tres pa lamang sa hapon.
Sa interview sang Bombo Radyo kay Passi City Mayor Stephen Palmares, iya ginpahayag nga ginpatawag na niya ang contractor nga nagakay-o sang amo nga taytay.
Suno pa sa alkalde, posible sa masunod nga tuig, makay-o naman ang bypass road sa pihak sang taytay nga amo ang ginalauman nga makabulig sa pagpahagan-hagan sang trapiko.
Dugang pa sang alkalde, ang Christmas rush ang isa man sa nagpadugang sang trapiko kag amo man ang nagadamo na nga tawo sa Passi City.
