ILOILO CITY – Nagapanghulam lamang sang bisekleta agud nga maka-ensayo ang Ilonggo cycling champ sa ginpatigayon nga Batang Pinoy National Championships 2022 nga ginpatigayon sa Vigan City, Ilocos Sur.
Sa interview sang Bombo Radyo kay Harvy Dolutan, gold medalist sa Time Trial Boys 14 and 15 category, iya ginpahayag nga wala ini sang kaugalingon nga bike kag agud nga maka-ensayo ini adlaw-adlaw, nagapanghulam lamang.
Suno pa sa iya, nag-umpisa ang iya pagkahilig sa cycling sang ginbaklan siya sang iya iloy sang mountain bike.
Sugod sadto, masami na siya nga naga-upod sa iban pa nga cycling enthusiasts kag nagapadulong sa mga malayo nga lugar.
Nagapasakup man siya sa mga karera kag masami nga nagapanguna.
Matapos ang kadalag-an, padayunon pa ni Doluton ang pagpasakup sa mga competitions kag maga-ensayo pa ini sang dugang.
Si Dolutan ang naga-eskwela sa St. Agustin Catholic School sa Dumangas, Iloilo apang may puluy-an diri sa syudad sang Iloilo.
Nagdaog man ang iban pa nga myembro sang Iloilo cycling team sa Batang Pinoy.
Si Brendz Agyn Celeran ang Criterium silver medalist sa Boys 14 and 15 category.
Criterium and Road Race Silver Medalist kag Time Trial Bronze Medalist si Maria Louise Criselle Alejado sa Girls 13 and under Category kag si Isiah Zaldariagga ang nagpasakup sa Boys 13 under.
Sila ang yara sa idalom ni Coach Lorena Blanco.
