ILOILO CITY – Nagpositibo sa African Swine Fever ang blood samples nga kuha sa duha ka mga baboy sa Barangay Jardin kag Ermita sa Dumangas, Iloilo.
Sa interview sang Bombo Radyo kay Iloilo Provincial Veterinarian Dr. Darel Tabuada, iya ginpahayag nga madamo sang nabaton nga report ang ila talatapan nga may nagkalamatay nga baboy sa amo nga banwa.
Gilayon nga ginpatigayon ang assessment kag naggwa nga positibo ang resulta.
Dugang pa niya, ang baboy nagikan sa Barangay Ermita ang nakalab-ot pa sa slaughterhouse sang banwa.
Bangud sini, gilayon nga ginpaidalom sa disinfection ang lugar.
Sa Barangay Jardin naman, gamay nalang ang numero sang baboy nga nabilin nga sakup sang 500 meter-radius nagikan sa isa ka backyard hog farm nga may infected nga baboy.
Sa subong, indi pa mahibaluan kun ngaa nga nagpositibo ang mga baboy sa lugar.
Natalana naman nga magpagwa sang executive order si Iloilo Governor Arthur Defensor, Jr. nga nagapaidalom sa bilog nga banwa sa red zone.
Samtang nga wala pa sang executive order, wala ginapahanugutan ang pagwa sang baboy sa banwa padulong sa mga lugar nga wala napaidalom sa red zone.
