ILOILO CITY – Hugot nga ginakampanya sang Bureau of Fire Protection ang paglikaw sa paggamit sang palupok.
Disyembre 1 sang nagsugod ang Oplan Paalala-Iwas Paputok Campaign sang ahensya.
Sa banwa sang Concepcion, nakapatigayon na sang nagkalain-lain nga sahi sang pagkampanya ang Concepcion Municipal Fire Station.
Sa interview sang Bombo Radyo kay Senior Fire Officer 3 Romelo Aguilar, Acting Municipal Fire Marshal sang Concepcion Municipal Fire Station, iya ginpahayag nga may yara sang ginpatigayon nga recurida, pagpangtakud sang Oplan Paalala posters kag Barangay Ugnayan Program.
Sa mga terminals kag sa pili nga mga lugar, may gin-deploy nga First Aid Standby Team.
Sa amo nga banwa, duha gid lamang ka mga kiosko ang nahatagan sang permit nga magbaligya suno pa sa natungdan.
Ang designated area ang nahamtang malapit man sa mismo fire station.
Suno pa sa iya, epektibo ang kampanya sang ahensya bangud nga madamo sang mga kabataan sa banwa ang nagagamit sang iban nga pamaagi agud nga magtuga sang gahud.
Manubo man ang numero sang mga nagabakal sang palupok.
Sumugod Disyembre 23, ginpaidalom na sa red alert status ang bilog nga Bureau of Fire Protection.
