Huyhuy ang abaga sang Philippine Azkals matapos ginkamasaan sang defending champions nga Thailand, 4-0, sa Group A match sa Asean Football Federation (AFF) Cup sa Thammasat Stadium sa Pathum Thani, Thailand.
Duha sa goals sang Thailand ang nagikan kay Teerasil Dangda sa ika-tres minuto sang hampang kag sa penalty kuatro minutos antes ang halftime.
Ang duha ka iban pa nga goals ang courtesy nanday Adisak Kraisorn sa ika-57 nga minuto, kag Suphanan Bureerat sa ika-63 nga minuto sang match.
Ini na ang ikaduha nga kalutusan sang Pilipinas sa tournament matapos nga ginlutos man ini sang Cambodia, 3-2, sa imbukada pa lang sang hinampang sang Disyembre 20.
Nagapabilin nga tres ang puntos sang Pilipinas sa group phase, samtang may anum naman ka puntos kag nagapanguna ang Thailand nga nagdaog sa ila una nga duha ka mga hampang.
Delikado ang tyansa sang Pilipinas sa semi-finals bangud nga pareho man nga abanse ang Indonesia kag Cambodia sa Group A bangud sa points tally kag sa head-to-head result.
Sa Group A, pinaka-nubo ang pwesto sang Brunei nga lunsay nalutos sa tatlo na ka mga hampang.
Duha gid lamang ka teams halin sa kada grupo ang maga-abanse sa semifinal round. ##
