ILOILO CITY – Nagpanindugan ang chairman sang Sangguniang Kabataan sa Barangay Tinocuan, Dingle, Iloilo nga indi na niya pagbag-uhon ang mga pagsulundan nga gin-set sa patigayunon nga disco karon sa gab-i.
Ini ang kasunod sang madamo nga reklamo nga nabaton sang Sangguniang Kabataan council matapos nga gin-post sa ila social media account ang advisory.
Sa advisory, ginadumilian ang pagsuksok sang shorts, jersey shorts, kag low ab shirts sa mga lalaki.
Sa mga babayi naman, ginadumili-an ang pagsuksok sang bayo nga crop top, sleeveless nga bayo, malip-ot nga bistida, palda kag short.
Sa interview sang Bombo Radyo kay May Joy Mosquera, iya ginpahayag nga indi na ini bag-o sa ila barangay.
Sang nagligad nga pabayle, ginpatuman man ini nga pagsulundan kag madamo sang nagpauli lang nga wala nakasaot.
Suno sa natungdan, ini ang may tinutuyo nga malikawan ang pagpangbastos ilabi na sa mga kababainhan.
Dugang pa niya, wala man sang problema sa ila kun wala sang may mag-disco sa ila barangay bangud sang strikto nga pagsulundan.
