ILOILO CITY – Ginapakig-angutan na sang Jaro Police Station ang pila pa sa mga nabiktima sang lalaki nga nagapangawat sang motorsiklo nga nadakpan sa distrito sang Jaro.
Ang arestado amo si Michael Vincent Condalor, 34, residente sang Barangay Aganan, Pavia, Iloilo.
Sa interview sang Bombo Radyo kay Police Captain Eduardo Siacon, Jr., hepe sang Jaro Police Station, iya ginpahayag nga may impormasyon sila nga nabaton nga madamo pa ang nabiktima ni Condalor.
Nahibaluan nga kahapon, gin-aresto si Condalor sa Barangay Seminario, Jaro sang ginpalagyo sini ang motorsiklo ni John Paul Eugenio, 21, residente sang Barangay Guzman- Jesena, Mandurriao Iloilo City.
Una diri, nagkitaay ang duha sa Jaro Cathedral bangud nga baklon sang suspek ang motorsiklo sang biktima.
Ginpahayag sang biktima nga i-physical test lang anay ang motorsiklo bangud nga yara sila sa gwa sang simbahan apang ginsakyan ini sang suspek kag nagpalagyo.
Ginlagas ini sang biktima apang bangud sang traffic congestion sa lugar, wala na nakapalagyo pa ang suspek kag nadakpan ini.
Preso na sa Jaro Police Station ang suspek.
