ILOILO CITY – Nagpanawagan ang Iloilo Provincial Veterinary Office sa publiko nga likawan gid ang pagbakal sang baboy nga infected sang African swine fever subong nga holiday season.
Sa interview sang Bombo Radyo kay Veterinarian Dr. Darel Tabuada, iya ginpahayag nga chekyaron gid sang maayo ang baboy antes baklon.
Lakip sa mga dapat tandaan amo nga lantawon gid kun may yara sang meat inspection certificate nga nagapamatuod nga nag-agi sa slaughterhouse ang baboy.
Chekyaron man ang panit sang baboy.
Kun may makita nga pantal-pantal ukon red spots, indi safe ang karne.
Apisar hugasan pa sang maayo ang karne, kita-on sa gihapon ang red spots.
Kun mabaho ang baboy, indi na pagbaklon ini.
Suno kay Tabuada, apisar wala sang kahalitan sa lawas sang tawo ang African swine fever apang delikado kun may yara sang ginasagud nga baboy ukon makadto sa lugar nga may baboy.
Kun ang damog ukon ang tubig nga ginhugas sa baboy ang makaon ukon malakot sa pagkaon sang baboy, malapta ang virus.
Sa subong, siyam ka banwa sa probinsya ang apektado sang balatian.
Bangud nga mabudlay ang magkontrol, ginapabaskog sang probinsya ang pagpatuman sang biosecurity measures sa mga barangay.
