Ginpanglibot sang mga pulis ang mga kabarangayan sa syudad sang Iloilo kag ginpangkumpiskar ang mga boga nga gingamit sa pagsug-alaw sang Bag-ong Tuig.
Sa interview sang Bombo Radyo kay Police Major Shella Mae Sangrines, station commander sa Iloilo City Police Station 1 kag spokesperson sang Iloilo City Police Office, iya ginpahayag nga temprano pa lang kahapon, may mga bata na nga nagpinalupok sang boga.
Iligal ang boga suno kay Sangrines kag peligruso gid bangud gina-modify pa gid sang nagagamit agud matunog ang lupok.
Mangin sa Department of Health central office, gin-cite man nga may mga kaso sang eye injuries subong nga tuig bangud sa paggamit sang mga bata sa boga.
Sa latest data, 15 ka mga boga ang nakumpiskar sang syudad, kun sa diin lima diri ang nakuha gikan sa Brgy. Veterans Village, duha sa Brgy. Tanza Bonifacio sa City Proper; kag tag-apat sa Brgy. Lanit, Jaro kag Brgy. Navais, Mandurriao.
Wala man ginpang-detain ang mga nagagamit sini, apang ginpangkumpiskar lang agud indi na liwat magamit.
