ILOILO CITY – Magatukod ang probinsya sang Iloilo sang programa nga may katuyuan nga mapabaskog ang food security kag maka-promote sang turismo kag climate change resiliency.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga ini ang tawgon nga “Gardening for MoRProGRes” – “Movement for a Robust, Progressive, Globally Competitive and Resilient Province of Iloilo.”
Suno pa sa gobernador, target sang iya administrasyon nga malab-ot ang mainuswagon, globally competitive kag mapag-on nga Iloilo pinaagi sa maayo nga pagdumalahan kag palareho nga distribution sang oportunidad kag resources.
Katuyuan sang MoRProgGRes nga ma-promote ang high-value crops sa nagkalain-lain nga agricultural settings para sa food security; ma-blend ang ornamental gardening, landscaping, kag high value crop production; makatukod sang agri-tourism destinations nga maka-promote sang paggamit sang recycled ukon upcycled materials; kag magbulig sa climate change response sang probinsya.
Ang MoRProGRes Gardens ang mahimo nga ma-establish pinaagi sa pagbinuligay sang partners ukon local government units; mga eskwelahan kag academic/technical education institutions; non-government organizations; people’s organizations; socio-civic organizations; religious organizations; farmers; social media netizens; business; kag iban pa nga sector.
Lakip sa ihatag nga bulig sa MoRProgGRes Gardens amo ang training ukon orientation sa high-value crop farming, ornamental plant gardening, landscaping, kag paggamit sang recycled ukon upcycled materials sa gardening; seedlings kag iban pa nga kinahanglanon sa gardening kag agri-tourism establishment management.
