Ginalauman sang Department of Trade and Industry nga mapasangkad pa ang potensyal sang Philippine exports paagi sa state visit ni President Ferdinand ‘Bongbong’ Marcos, Jr. sa China umpisa buwas, Enero 3.
Suno kay Trade Secretary Alfredo Pascual, pamatuod ang pagbisita ni Marcos sa Beijing nga importante nga trading kag investment partner ang China sa Pilipinas.
Suno pa sa opisyal, mangin paagi ini agud mapabaskog pa ang trade and investment relations sang duha ka pungsod, partikular na sa amat-amat nga pagbangon halin sa epekto sang pandemya.
Nag-organisar man ang ahensya sang serye sang roundtable meetings para sa presidente kadungan sang iya nga state visit kaupod sa major Chinese companies nga may yara sang investments ukon ginaplano pa lang nga investments sa Pilipinas.
Ini nga mga kumpaniya amo ang yara sa key sectors sa China kaangay sang agribusiness, renewable energy, steel making, nickel ore processing kag battery production, kag electric vehicle manufacturing.
Ginalauman man nga magapartisipar sa meetings ang Chinese importers sang tropical fruits halin sa Pilipinas.
