ILOILO CITY – Nagmandu na ang pamunuan sang Public Safety and Transportation Management Office sa mga traffic aides sa syudad nga tutukan ang pagdelihir sang trapiko kag indi mangbentaha sa mga motorista.
Ini ang kasunod sang mandu ni Iloilo City Mayor Jerry Treñas sa tanan nga mga traffic aides nga magbulig sa pag-manage sang trapiko kag indi magtutok sa pagpamantay sang sala sang mga drivers.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga madamo ang mga complaints nga ila nabaton nga ang mga traffic aides ang wala naga-ubra sang ila responsibilidad sa mga dalanon.
Sa tion nga madakpan ang mga traffic aides nga wala naga-ubra kag nagapasilong lamang sa higad sang dalan kag naga-istorya sa kaupod, may nagahulat nga suspension nga tubtob sa duha ka semana.
Nagpangayo man si Conlu sang bulig sa mga pumuluyo sang syudad kag sa netizens nga ipahibalo sa ila opisina sa tion nga may makita nga traffic aides nga nagaligoy.
Sa subong, may yara sang red team nga amo ang naga-monitor sang compliance sang mga traffic aides.
