ILOILO CITY – Magapakig-angot si Iloilo Governor Arthur Defensor, Jr. sa Department of Budget and Management agud maistoryahan ang pondo para sa proyekto sa probinsya sa idalom sang National Task Force to End Local Communist Armed Conflict.
Ini matapos nga madamo pa sang mga proyekto ang wala ma tapos-tapos sang tuig 2022 kag may mga nabilin pa kuntani nga pondo.
Sa interview sang Bombo Radyo kay Governor Defensor, iya ginpahayag nga kun may pondo nga nabilin nga dapat kuntani na-utilize sang 2022, gilayon ini nga ibalik sa National Treasury.
Buot silingon, kinahanglan naman liwat nga magpangayo sang pondo sa diin mahimo ini ipasulod sa supplemental budget.
Ang implementing agency amo ang Department of Budget and Management samtang ang sa monitoring amo naman ang Department of the Interior and Local Government.
Suno kay Defensor, ang proyekto sang National Task Force to End Local Communist Armed Conflict ang isa ka local government assistance fund.
Naka-secure na sang institutional support si Defensor nagikan kay Interior Secretary Benjamin Abalos kag nagpahayag man ang tiglikom nga mabulig sya sa probinsya.
Ang luyag sang gobernador amo nga mahatagan sang tyansa nga mpadayon ang mga proyekto.
Lakip sa mga rason kun ngaa nga indi matigayon ang proyekto amo nga wala sang may nagakuha nga contractor bangud nga indi kumporme sa pondo ilabi na kun malayo ang isa ka lugar nga patukuran sang proyekto.
