ILOILO CITY – Ginpasakaan na sang kaso ang tatlo ka mga suspek nga ginatudlo naghimulos sa pito ka tuig nga bata nga babayi sa Barangay Gogo, Estancia, Iloilo.
Sa interview sang Bombo Radyo kay Police Staff Sergeant Dan Jerald Allanic, imbestigador sang Estancia Municipal Police Station, iya ginpahayag nga pito ka mga witnesses ang positibo nga nagtumod sa tatlo ka mga suspek nga amo ang naghimulos sa bata.
Nagpamalibad ang kapulisan nga maghatag sang identity sang mga ginpasakaan sang kaso apang suno kay Allanic, ang isa sa mga suspek ang nadakpan sa drug buy-bust operation sang Enero 2 subong nga tuig.
Base sa ginpasa nga data sang Police Regional Office VI sang amo man nga adlaw, ang nadakpan sa drug buy-bust operation amo si Roginald Agotera, 38, residente sang Purok 1, Barangay Daculan sang amo man nga banwa.
Kaso nga Rape with Homicide ang ginpasaka batuk sa tatlo ka mga suspek.
Ginkumpirma naman sang kapulisan nga base sa laboratory examination, ginhimuslan gid ang pito ka tuig nga bata.
Kung madumduman, Disyembre 19, 2022 sang nasapwan nga patay ang bata kag wala na sang panapton.
