ILOILO CITY – Nagdangat sa 47 ka mga motorista ang na-apprehend sang Iloilo City Public Safety and Transportation Management Office upod ang Philippine National Police nga nagalapas sa nagkalain-lain nga road safety regulations sa pila ka distrito sang syudad sang Iloilo kagab-i, Enero 5.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga sa amo nga numero, indi mangnubo sa 15 ang mga nadakpan nga nagagamit sang illegal mufflers nga nagatuga sang gahud sa kagab-ihon.
Base sa record suno kay Conlu, wala sang second offender humalin sa una nga adlaw sang operation.
Nahibaluan nga ini na ang ikatatlo nga gab-i nga nagpatigayon sang operasyon ang otoridad agud nga madakpan ang mga traffic violators.
Nagpasalig naman si Conlu nga ang tagsa ka mga police stations sa syudad ang magapadayon sang operasyon batuk sa mga traffic violators.
