ILOILO CITY – Wala si Iloilo City Vice Mayor Jeffrey Ganzon sang may nabaton nga dokumento para sa leave of absence ni Councilor Urminico “Nick” Baronda antes ini nagpadulong sa luwas sang pungsod.
Nahibaluan nga may gin-file nga leave of absence si Baronda nga napetsahan sang Disyembre 16, 2022.
Sa interview sang Bombo Radyo kay Ganzon, iya ginpahayag nga nabaton lang niya ang leave of absence si Baronda sang Enero 3 subong nga tuig.
Nagakahulugan nga ang aprubado lamang nga leave sini ang nag-umpisa sa amo nga adlaw.
Suno kay Ganzon, nagkonsulta siya sa Department of the Interior and Local Government agud maathagan sa nasambit nga isyu kag kun may salabton si Baronda.
Ginpahayag sang bise alkalde nga wala siya na-notify sa leave of absence ni Baronda apisar nga siya ang nagapungko bilang presiding officer sang Sangguniang Panlungsod.
Gin-athag ni Ganzon nga ginpirmahan sini ang leave of absence ni Baronda apang, ginpasigurado sini nga indi ini manabat sa kapaltahan sang konsehal.
Kuntani suno sa bise alkalde, magserbe ini nga leksyon sa iban pa nga mga konsehal nga indi mag-leave, kun indi aprubado ang ila dokumento.
Una na nga ginpabutyag ni Iloilo City Councilor Plaridel Nava nga magapasaka ini sang kaso administratibo sa Ombudsman batok kay Baronda bangud sa paglapas sa Memorandum Circular No. 35 sang Office of the President.
Ini ang kasunod sang pagtambong ni Baronda sa special session sang Disyembre 28, 2022 samtang nga yara ini sa luwas sang pungsod kag wala naka-file sang leave of absence ni Baronda kag wala sang authority to travel.
