ILOILO CITY – Nagakadapat nga may yara man sang internal cleansing strategies ukon programs nga ginahimo sa Philippine Drug Enforcement Agency magluwas sa Philippine National Police.
Ini ang may kaangtanan sa panawagan ni Department of the Interior and Local Government Secretary Benjamin Abalos sa mga police colonels kag generals nga magpasa sang courtesy resignation bangud sa problema sa iligal nga droga.
Sa interview sang Bombo Radyo kay Iloilo Second District Board Member June Mondejar, chairman sang Committee on Public Order and Security, iya ginpahayag nga may mga officials sang Philippine Drug Enforcement Agency nga naangot sa iligal nga droga sa diin sang Disyembre 2022, natigayon nga madakpan ang district office chief sang ahensya kag duha ka mga agents nila sa isa ka drug buy bust operation sa Taguig City.
Sa nasambit nga operasyon, masobra P9.1 million ang balor sang nakumpiska nga shabu kag apat ka mga issued firearms.
Bangud sini suno kay Mondejar, mas maayo kun tinlu-an man ang hanay sang Philippine Drug Enforcement Agency bangud kabahin man sila sa pagpakig-away batuk sa iligal nga droga.
Sa apelar naman ni Secretary Abalos pahayag sang board member, indikasyon lamang ini nga ginahatagan sang ahensya sang igtalupangod ang problema sang pungsod agud nga masolbar.
Pabor siya sa courtesy resignation sa mga colonels kag generals bangud nagakinahanglan na gid man suno sa iya nga matinluan ang hanay sang kapulisan kag dapat nga ma-umpisa gid man ini sa mga matag-as ang posisyon.
Daw indi maayo pahayag niya nga may mga high ranking officials sa Philippine National Police nga posible may kaangtanan sa iligal nga droga.
Matapos kuntani nga matinluan ang mga yara sa ibabaw suno kay Board Member Mondejar, sundon man ang mga yara sa idalom ukon ang mga station commanders nga magpasa man sang courtesy resignation agud matinluan ang organisasyon.
