ILOILO CITY – Posible nga magabalik na liwat sa paghampang sa masunod nga semana ang Golden State Warriors star nga si Stephen Curry matapos nga nag-upod ini sa full practice sa labing una nga panahon humalin sang na-dislocate ang iya nga wala nga abaga.
Si Curry ang naka-agum sang injury sa hampang nila batuk sa Indiana Pacers sang Disyembre 14.
Gintapos ni Curry ang practice sa shooting drills samtang nga nagasuksok sang puti nga sleeve sa idalom sang iya jersey sa idalom sang iya wala nga kamot kag abaga.
Suno kay Warriors general manager Bob Myers, posible nga makabalik na sa paghampang si Curry sa Byernes batuk sa San Antonio Spurs.
Apang suno kay Head coach Steve Kerr, dapat nga mangin medically cleared na si Curry sa iya pagbalik sa reigning champion nga Warriors.
Ang 34 anyos nga si Curry ang naga-average sang 30.0 points, 6.8 assists kag 6.6 rebounds per game antes ang iya injury kag shooting nga 50% nagikan sa field.
Kadungan sang absence ni Curry, nagpadayon ang manubo nga winning rate sang team.
