ILOILO CITY – Ginmandu-an ni Police Regional Office VI Police Brigadier General Leo Francisco ang Criminal Investigation and Detection Group Region VI nga magpatigayon sang maid-id nga imbestigasyon sa natabo nga pagsigabong sa opisina sang Regional Explosive Ordnance and Canine Unit sa sulod sang compound sang Iloilo City Police office.
Personal nga nagpadulong si Francisco sa lugar kag nagpatigayon sang inspection.
Nagpasalamat ini nga wala sang may napatay kag wala sang turned over explosives nga naglupok.
Nagpakig-angut naman ini kay Police Major Serafin Jun Reyes, ang chief sang Regional EOD and Canine Unit Region VI may kaangtanan sa ginaduso nga pagpatindog sang separado nga opisina sang Explosive Ordnance Division agud nga malikawan ang kaangay nga insidente kag masiguro ang safety sang mga personnel sang opisina kag amo man sang mga sibilyan.
Nahibaluan nga napilasan sa amo nga pagsigabong sanday Patrolwoman Shyrine Manuel, Fernando Sabidalas nga lineman sang isa ka telecommunication company kag John Mark Garcia.
Kahapon sang hapon, nakagwa na sa ospital si Patrolwoman Manuel.
