ILOILO CITY – Nakapakig-angot na ang Iloilo Provincial Government sa Civil Aviation Authority of the Philippines may kaangtanan sa direktiba sang Department of Health nga hugot nga i-monitor ang mga travellers halin sa China.
Sa interview sang Bombo Radyo kay Dr. Ma. Socorro Quiñon, head sang Provincial Health Office, iya ginpahayag nga nakahanda na ang mga personnel sang talatapan nga atubangon ang panibag-o nga pagpanghangkat.
Sa pagkamatuod suno kay Dr. Quiñon, wala man sang direct flight ang Iloilo International Airport sa China apang luyag lang nga masiguro nga indi masudlan ang probinsya sang Iloilo sang ano man nga virus.
Nagpanugyan man ang nagtungdan nga dapat indi gid magkampante kag padayunon ang pag-practice sang minimum public health standards.
Nahibaluan nga 16 na ka mga pungsod sa bilog nga kalibutan ang nagbutang sang restrictions sa mga travellers sa China sa diin naga-require sang negative COVID-19 test result magluwas lang sa Morocco nga nagpatuman sang ban sa mga pasahero halin sa China.
