ILOILO CITY – Ginpanindugan sang chief sang Western Visayas Sanitarium and General Hospital nga wala sang delay sa sweldo kag benepisyo sa mga plantilla personnel.
Sa interview sang Bombo Radyo kay Dr. Judy Ann Dumayas, pinuno sang nasambit nga ospital, iya ginpanginwala ang mga alegasyon sang accountant nga amo man ang presidente sang Western Visayas Sanitarium Employees Association nga union sang mga permanent employees sang ospital.
Ang sweldo sang Disyembre kag benepisyo suno kay Dr. Dumayas ang nahatag sa mga empleyado sang Disyembre 23, 2022.
Pahayag sang doktor, ang sweldo naman sang Contract of Services para sa bulan sang Nobyembre ang ginhatag sang Disyembre 27 matapos gina-alegar gin-tamper sang accountant rason nga wala ini mahingagaw nga ma-release sang Disyembre 23, las dos sang hapon nga amo ang cut off sa bangko.
Buot silingon, wala ini nahingagaw balanse sang payroll clerk.
Pahayag ni Dr. Dumayas, may mga sweldo man sang COVID-19 nurses kag doctors nga gina-alegar nga wala gin-proseso sang accounting office kag ginpangkakas ang mga pangalan sa payroll apang ang Management kag Executive Committee ang naghimo sang tikang kag ma-override ang Accountant rason nga natigayon ini tanan nga ma-release antes magtakop ang tuig 2022.
Dugang pa sang natungdan, paga-imbestigaran ang atrasado nga transaksyon sang accountant sa ginaalegar katuyuan nga ma-kontrol ang management humalin pa sang tyempo ni Dr. Annabelle de Guzman tubtob subong.
Wala na ginhingadlan pa ni Dr. Dumayas ang ginatumod nga accountant.
