ILOILO CITY – Amat-amat na nga nakuha ang kalain sang buot sang mga nagpasakop sa Mayor Jerry P. Treñas 1st Iloilo City of Love Dinagyang Duathlon sang nagligad nga Sabado, Enero 7.
Ang amo nga event ang gin-ulan sang pagpakamalaot bangud sang tuman ka gamay nga premyo nga wala nabutang sa poster.
Madamo man sang nagreklamo bangud nga P1, 500 ang registration fee apang isa lamang ka burger kag isa ka tubig ang ginhatag sa mga participants.
Sa interview sang Bombo Radyo kay Rhea Jinon Jagunap sang Leganes, Iloilo kag may anak nga participant, iya ginpahayag nga sa poster sang lloilo Active Sports, ang nakabutang nga premyo ang nagdangat sa P8, 000 plus trophy para sa first place winner; P6, 000 plus trophy para sa second place winner; kag P4, 000 plus trophy para sa third place winner.
Apang, ang natabo amo nga ang mga nasambit nga prizes ang para sa top thee players lamang kag may yara pagid sang separado nga premyo para sa mga top three winners sa tagsa ka age category.
Ang premyo ang tuman ka nubo kun ipa-anggid sa registration fee.
Suno pa sa natungdan, mas maayo kuntani kung nahibaluan sang temprano sang mga participant ang ihatag nga premyo.
Dugang pa sang natungdan, makahuluya ang natabo bangud nga ang Iloilo City ang ginakabig nga Bike Capital of the Philippines kag nakabaton pa sang award sa Galing Pook Awards may kaangtanan sa bike lane program.
Sa nahibaluan ni Jagunap, ang opisina ni Iloilo City Councilor Johnny Young amo ang organizer sang event.
