ILOILO CITY- Nagpadala sang sulat kay Department of Public Works and Highways Secretary Manuel Bonoan si Iloilo 2nd District Rep. Michael Gorriceta agud hingyuon ang temporaryo nga pagbukas sa Ungka flyover.
Sa interview sang Bombo Radyo kay Rep Mike Gorriceta , iya ginpahayag nga sa iya sulat, ginapangabay niya ang pagpahanugot sa pagbukas sang pila ka lanes nga nakompleto na ang retrofitting agud nga mahagan-hagan ang mabug-at nga problema sa trapiko sa lugar.
Suno kay Gorriceta, ginplastar niya sa sulat nga para lang anay sa mga light vehicles ang paggamit sang pagabuksan nga lanes.
Dugang niya, ginhingyo man sa amo nga sulat ang pagpatigayon sang ahensya sang maid-id nga imbestigasyon sa issues kag concerns agud maghatag sang posible nga tikang kag madasig nga solusyon para sa benepisyo sang publiko.
