ILOILO CITY – Nagpasalig ang pamunuan sang Iloilo City Public Safety and Transportation Management Office nga ginasunod nila ang marching order ni Iloilo City Mayor Jerry Treñas nga pangdakpon ang mga traffic violator sa syudad sang Iloilo.
Sa interview sang Bombo Radyo kay Mr. Jeck Conlu, pinuno sang talatapan, iya ginpahayag nga padayon ang ila pag-operate batuk sa mga naga-illegal park kag ang pagpangdakup sa mga illegal mufflers.
Ini na ang mangin kampanya sang talatapan sa bilog nga tuig suno kay Conlu.
Sa illegal muffler, pahayag sang natungdan, kada gab-i, padayon ang pagpangdakup sang mga personnel upod sa Philippine National Police.
Sa mga naga-illegal park naman, kahapon, nagdangat sa 128 ang nagkaladakpan base sa ginhatag nga report kay Mayor Treñas.
Gina-isyuhan sang ticket ang mga drivers nga madakpan kag may multa nga P300 sa first offense.
Kun wala naman sang may naabtan nga driver, ginabilin ang ticket kag gina-alarm ang Land Transportation Office.
Indi sila maka-renew sang ila nga salakyan ukon driver’s license sa tion nga indi sila makabayad sang multa sa Iloilo City Hall.
Dugang pa ni Conlu, ginaproseso na subong ang pagbakal sang tow truck kag clamping equipment.
