Gin-anunsyo sang Department of Agriculture (DA) nga temporaryo anay nga untaton ang pagbaligya sang barato nga mga bombay sa Kadiwa stores epektibo buwas nga adlaw, Enero 13.
Suno kay Agriculture Spokesperson Kristine Evangelista, nag-lapse na sang nagligad nga Disyembre 31, 2022 ang ila nga memorandum of agreement sa ila supplier nga Food Terminal Incorporated (FTI).
Apang gin-athag sang opisyal nga naga-plano subong ang ahensya sang ikaduha nga cycle agud nga mapadayon pagbaligya sa bombay sa mas barato nga presyo.
Ikonsiderar suno sa spokesperson ang bag-o nga farmgate price sa local onions.
Ini nga anunsyo sang DA ang kasunod sang pagbukas sang Office of the Ombudsman sang imbestigasyon batok sa ahensya bangud sa pagbakal sang bombay sa mahal nga presyo kag pagbaligya sini sa barato nga presyo.
Sa Kadiwa stores suno sa price monitoring, yara sa P170/kilo ang baligyaanay samtang sa merkado naman, nagapanglakaak sa P500-600 ang presyo sa kada kilo. ##
