Ginbasura sang korte sa Taguig ang gin-file ni Denice Cornejo nga motion to reconsider kasunod sang order sa korte nga nag-grant sang pyansa sa comedian-host nga si Vhong Navarro.
Sa tatlo ka pahina nga order, gin-dismiss ni Taguig Regional Trial Court Branch 69 Presiding Judge Loralie Datahan ang motion ni Denice bangud sa kakulang sa merito.
Ginpahayag sang korte nga ang pag-file sang motion ang wala sang conformity sa Office of the City Prosecutor sa Taguig City.
Suno sa Regional Trial Court, kun wala naghatag ang public prosecutor sang conformity sa gin-plead sang isa ka partido, buot silingon, wala sang required legal personality ang partido agud nga i-pursue ang kaso.
Matandaan nga sang Disyembre 2022 sang ginpahanugutan sang korte nga maka-pyansa ang 45-anyos nga comedian-host sang P1 million para sa iya nga temporaryo nga kahilwayan samtang nga padayon ang hearing sa korte sa rape case nga gin-file sang model batok sa iya. ##
