ILOILO CITY – Nagpanindugan ang pamilya sang biktima sa natabo nga shooting incident sa Iloilo Terminal Market nga wala na ini nagbalik sa pag-engage sa iligal nga droga.
Ang biktima amo si Melvin Roque, 46, residente sang Barangay Rizal Pala-pala II, Iloilo City Proper, manugbaligya sang isda sa amo nga merkado.
Sa interview sang Bombo Radyo kay Julian Lorete, ugangan sang biktima, iya ginpahayag nga kadungan sang kaadlawan sang biktima subong nga adlaw, matapos na ang iya rehabilitation program.
Gin-ako sang pamilya nga na-angut ini sa iligal nga droga kag sang mga nagliligad lang nga tuig nakagwa.
Apang, suno kay Lorete, nagtutok ini sa iya pamilya kun sa diin, apisar sang pagpamalabag sang iban pa nila nga mga pamilya, nag-negosyo ini sang isda.
Ginakabig ni Lorete nga isa ka mabuot nga tawo ang iya umagad.
Samtang, ginalantaw sang pamilya nga daan nga pagdumot ang motibo sa pagpatay sa biktima.
Sa pahayag sang Iloilo City Police Station 1, iligal nga droga ang ila ginasundan nga motibo.
Kung matandaan, kaina sang aga, ginluthang ang biktima sang makapila ka beses samtang nga nagalakat sa fish section sang merkado.
Wala pa sa gihapon sang identity sang suspek ang kapulisan.
