ILOILO CITY – Nag-file sang motion for reconsideration sa korte ang pamilya sang mga biktima sa natabo nga pagpangluthang sa Barangay Villa Pani-an, Estancia, Iloilo sang tinalikdan nga Septyembre 14, 2022.
Ang mga biktima amo sanday John Paul Bosque, residente sang Lopez Jaena Sur, La Paz, Iloilo City; Chrysler Floyd Fernandez, residente sang Jereos, La Paz, Iloilo City; kag Mark Clarenz Libao sang Tacas, Jaro, Iloilo City.
Ang mga suspek naman amo sanday Jevron Parohinog nga amo ang lone survivor sa krimen; utod sini nga si Jix; Michael Porras; Michael Quiachon; Benzen Llamado; kag anum ka mga John Does.
Ang kaso nga three counts of murder batuk sa mga suspek ang gin-dismiss sang Iloilo Prosecutor’s Office sang Disyembre 10, 2022 bangud sa kapaslawan sang mga imbestigador nga mag-present sang nagaka-igo nga ebidensya nga makapakita nga ginhimo sang mga suspek ang pagpatay sang tatlo.
Sa motion nga gin-file sang pamilya sang mga biktima pinaagi sa ila legal counsel nga si Atty. Angelo Aninao, ginplastar ang pila ka grounds.
Una, ang sworn statement sang respondent nga si Jevron Parohinog ang mahimo magamit bilang ebidensya bangud nga ang affiant ang wala sa idalom sang custodial investigation sang ginkuhaan sang statement.
Ikaduha, si Jevron Parohinog ang may klaro nga motibo sa paghimo sang krimen.
Base sa resolution sang prosecutor’s office, matuod nga makabenepisyo si Jevron kag ang iya utod nga si Jix, apang ang motibo lamang ang indi makabig nga proof of crime.
Ikatatlo, nagapati ang mga complainants nga may yara sang bastante nga circumstancial evidence agud nga suportahan ang finding nga may yara sang nagaka-igo nga ebidensya agud nga padayunon ang kaso base sa pahayag ni Jevron sa pamilya sang mga biktima; ang judicial affidavits sang witnesses; ang medico-legal reports; ang inventory sang nakuha nga mga ebidensya; kag pila pa ka mga dugang nga ebidensya.
Kag ika-apat, ang pagbayluhanay sang mensahe sang biktima nga si Bosque sa iya fiance nga nagdugay tubtob alas-12:09 sang aga sang Septyembre 14 ang isa ka klaro nga indikasyon nga natabo ang krimen sa Estancia, Iloilo.
