ILOILO CITY – Naga-umpisa na ang Iloilo Provincial Veterinary Office sa pagpanagtag sang rabies vaccines sa mga kabanwahanan sa probinsya sang Iloilo.
Sa interview sang Bombo Radyo kay Dr. Darel Tabuada, Provincial Veterinarian, iya ginpahayag nga 21,000 vials ang gin-procure sang probinsya nga maka-cover sang masobra 200,000 ka mga ido ukon 70% sang dog population.
Suno kay Tabuada, P9 million ang ginpain nga pondo ni Gov. Arthur Defensor, Jr. para sa rabies vaccines bangud kun basehan ang mga nagliligad nga tinuig, ang probinsya sang Iloilo ang may pinakamataas nga canine rabies cases sa pungsod.
Ginalantaw sang natungdan nga maka-umpisa ang probinsya sang full blown rabies vaccination sa bulan sang Pebrero agud nga malab-ot ang 70% target dog population nga mabakunahan.
Bangud sini, pahayag ni Dr. Tabuada, wala na sang rason pa ang isa ka banwa nga magsiling nga wala ini sang accomplishment sa rabies vaccination bangud may yara na sila sang libre nga vaccines para sa mga ido.
Nagpasalig man ang Provincial Veterinarian nga i-monitor sang talatapan ang mga banwa kun nagapatigayon sang rabies vaccination.
Sa subong, may yara sang 307,578 ka mga ido sa probinsya sang Iloilo.
