ILOILO CITY – Patay ang isa ka lalaki matapos nakabunggo ang motorsiklo nga ginasakyan sini sa naka-park nga van sa Nichol St., Poblacion, Alimodian, Iloilo.
Ang napatay amo si Eliseo Claveria alyas “Kano”, 37, kag residente sang Rizal St., Poblacion, Alimodian, Iloilo.
Sa interview sang Bombo Radyo kay Police Lieutenant Chrysler John Ledesma, hepe sang Alimodian Municipal Police Station, iya ginpahayag nga pauli na ang biktima nagikan sa Barangay Sinamay sang amo nga banwa matapos nagtambong sa isa ka birthday party.
Suno kay Ledesma, indi diretso ang dalagan sang motorsiklo bangud nga naka-inom ang biktima kag nakabunggo sa naka-park nga van sa pihak nga lane.
Patal nga pilas sa ulo ang naagum sang biktima nga amo ang gintuna-an sang iya kamatayon.
Wala naman sang may ginasuksok nga helmet ang biktima suno pa sa imbestigasyon sang kapulisan.
