Iloilo City – Nagpasalig ang tribe manager sang Familia Sagasa nga isa sa mga tribu sa Dagyang sa Barangay sa Dinagyang Festival 2023 ang isa ka de-kalidad nga perfomance sa Enero 22.
Sa interview sang Bombo Radyo kay Francis “Mike” Vito, iya ginpahayag nga pulawanay kag kakapoy ang ila kapital para lang nga mapalipay ang mga tumalan-aw.
Pahayag niya, pagpanghangkat man sa ila preparasyon amo nga wala sila sang malapad nga venue para sa ila practice,apang sa pihak sini,desidido sila nga mahatag ang pinakamaayo nga performance.
Suno sa natungdan, isa man ka handom nga natuman ang iya papel bilang tribe manager ilabi pa nga pila ka dekada naman ini nga nagapartisipar sa Dinagyang Festival.
Suno sa iya, nagsugod siya bilang isa ka drummer sang 12 anyos pa lamang siya tubtob nga subong, isa na ka tribe manager.
Dugang niya, indi niya pag-usikan ang kahigayunan nga mapakita sa bilog nga kalibutan ang abilidad sang mga Ilonggo sa patag sang cultural presentation.
Nahibaluan nga ang tribu Familia Sagasa ang pinakauna nga tribu nga nagkampeon sa Ati tribe competition sang 1977 kag una nga tribu man nga nakuha ang grandslam champion matapos nga sunod-sunod ang ila kadalag-an sang 1990,1991,kag 1992.
Ang Tribu Familia Sagasa nga magapasunday sa Enero 22 ang may yara sang 50 warriors, 30 side dancers, kag 50 drummers.
Sila ang una nga tribu nga maga-perform sa Iloilo Freedom Grandstand.
