Oton, Iloilo – Wala pa sa gihapon sang may natumod nga person of interest ang Oton Municipal Police Station kun sin-o ang utok sang pagpangawat sang pila ka mga gamit sa Oton Central Elementary School.
Madumduman nga nagpabilin pa sang mensahe ang suspek sa black board nga nagasiling: “Pasensya na, wala kaming bigas, kami ang magnanakaw”.
Sa interview sang Bombo Radyo kay Police Major Fernand Limbungan, hepe sang Oton Municipal Police Station, iya ginpahayag nga nabudlayan sila magkuha sang identity sang suspek bangud wala sang closed-circuit television sa eskwelahan.
Suno kay Limbungan nakuha sang suspek amo ang lima ka mga electric fan, isa ka aircon, kag isa ka flat screen television halin sa lima ka classrooms kag Parents-Teachers Association office.
Madumduman nga nagluntad ang kinawatay sang Enero 15.
Nagapadayon naman ang imbestigasyon sang kapulisan agud matumod ang identity sang suspek.
