Ginkoronahan ang tiglawas sang Cabatuan, Iloilo bilang Miss Iloilo 2023.
Nagpangibabaw sa 18 ka mga kandidata subong nga tuig ang 19-anyos nga si Raniele Shaine Saulog nga isa ka second year student sang Bachelor of Science in Architecture sa Iloilo Science And Technology University.
Nakuha man sang Cabatuananon beauty queen ang Best in Theme Costume award sa amo nga pageant.
Sa interview sang Bombo Radyo kay Raniele, iya ginpahayag nga wala gid siya naglaum nga siya ang magadaog sa Miss Iloilo bangud indi siya front-runner kag indi man siya crowd-favorite.
Bilang isa ka first-timer sa patag sang pageantry, tuman man ang pagpasalamat sini sa tanan nga supporters nga yara sa iya nga likod.
Plano sini nga padayunon ang iya nga advocacy nga nagatib-ong sang emotional and mental wellness.
Samtang, first runner up naman si Chloei Darl Gabales sang Jaro nga naghakot sang kadam-an nga special kag minor awards lakip na ang Best in Swimsuit, Best in Swimwear Underwater Shoot, kag Best in Evening Gown Award.
Second runner-up si Tracy Lois Bedua sang Barotac Nuevo; third runner-up si Ma. Cristina Isabel Tallador sang Pavia; kag fourth runner-up si Jeraldine Quimson sang Mandurriao nga nakakuha man sang Best in The Throne Online Interview.
Apisar may yara na sang Miss Iloilo 2023 kag runners-up, subong pa lang nga adlaw, Enero 19, pinal nga i-anunsyo kun sanday sin-o ang maga-compete para sa Miss Universe Philippines, Binibining Pilipinas, kag Miss World Philippines.
Una na nga ginpaathag sang Miss Iloilo organization nga may separado nga sashing ceremony bangud hatagan sang ligwa ang judges nga maka-deliberate kun sin-o sa Miss Iloilo 2023, first runner-up kag second runner-up ang magatiglawas sa Iloilo City sa tatlo ka pinakadaku nga national pageants sa pungsod. ##
