ILOILO CITY – Nakuha-an sang halos P7 million nga balor sang iligal nga droga ang isa ka pangayaw nga lalaki sa ginpatigayon nga drug buy-bust operation sa isa ka resort sa Barangay Barosbos, Carles, Iloilo.
Ang subject amo si Mathew James Bacos, 20, residente sang Barangay Botongon, Estancia, Iloilo.
Nakuha kay Bacos ang ginabanta isa ka kilo nga shabu nga may standard drug price nga Php 6,800,000.00.
Sa interview sang Bombo Radyo kay Police Master Sergeant Manuel Vincent Hermogenes, information officer sang Carles Municipal Police Station, iya ginpahayag nga makabig nga high value individual si Bacos bangud man sa volume sang droga nga nakuha sa iya.
Posible suno kay Hermogenes nga i-distribute ni Bacos ang iligal nga droga sa iban nga mga banwa ukon sa syudad sang Iloilo para sa Dinagyang Festival.
Sa subong, padayon pa nga gina-imbestigaran sang kapulisan kun sa diin ang source sang iligal nga droga.
Pasaka-an sang kaso nga paglapas sa Sections 5 kag 11 sang Article II sang Republic Act 9165 ukon ang Comprehensive Dangerous Drugs Act of 2002 ang subject.
