ILOILO CITY – Siraduhon na ang mga mayor nga dalanon sa Iloilo City Proper umpisa alas-sais sa aga bwas, Disyembre 20 para sa tatlo ka adlaw nga highlight sang Dinagyang Festival 2023.
Sa interview sang Bombo Radyo kay Mr. Jeck Conlu, pinuno sang Public Safety and Transportation Management Office, iya ginpahayag nga ang mga dalan nga siraduhon sa trapiko agud maghatag ligwa sa Opening salvo sa ala-una sa hapon amo ang dalan Iznart, Ledesma, Valeria, Quezon kag porsyon sang Ledesma bangud diri magalabay ang parada sa tanan nga judging area sang Dinagyang.
Yari ang giya sa mga salakyan:
*Ang mga depampasahero nga salakyan nga may ruta nga Jaro-City Proper ang kutob lang sa rotonda sang La Paz
*Ang halin sa La Paz ang kutob lang sa likod sang Provincial Capitol, maliko sa Quirino bridge padulong sa Rizal, La Paz
*Ang may ruta nga Villa Arevalo ang kutob lang sa Mabini- Ledesma – De Leon – Fuentes kag balik sa orihinal nga ruta
* Ang may ruta nga Mandurriao ang kutob lang sa Mabini Street
* Ang may ruta nga Timawa ang kutob lang Ledesma- Mabini – De Leon- Fuentes kag balik sa orihinal nga rota
* ang may ruta nga Parola ang tubtob lang sa Plaza Libertad balik sa port area
Magluwas sa road closure bwas sa aga, sirado naman ang Valeria Street, Arsenal Street, Yulo Street, Aldeguer Street, Delgado Street kun sa diin ginapahamtang ang food festival.
Para naman sa hiwaton nga Dinagyang Ilomination sa Sabado sang gab-i sa Enero 21, indi na ma-access ang mga establishment sa Diversion Road.
Samtang, kadungan sang Dinagyang Festival, nagdangat sa 600 ka mga personnel sang Public Safety and Transportation Management Office ang iga-deploy.
