ILOILO CITY – Nagkampyeon ang Tribu Parianon nagikan sa distrito sang Molo sa ginhiwat nga Dinagyang sa Barangay sa Dinagyang Festival 2023.
Gindala pauli sang Tribu Parianon ang P1 million nga cash prize kag trophy.
Nakuha man sang tribu ang special awards nga Best in Music, Best Choreography, kag Best in Performance.
Samtang, 1st runner-up naman ang Tribu Molave kang Salog kag 2nd runner-up ang Tribu Sagasa.
Ang Tribu Molave kang Salog ang nakakuha sang P300, 000 kag trophy samtang ang Tribu Sagasa ang nagdala pauli sang P200, 000 kag trophy.
Ang iban pa sa mga minor awards amo ang People’s Choice Awards, Best in Production Design kag Best in Costume Design and Headdress nga nakuha tanan sang Tribu Molave kang Salog.
Best in Discipline naman ang Tribu Panaad.
Sa interview sang Bombo Radyo kay Mr. Ramil Huyatid, choreographer sang Tribu Parianon, iya ginpahayag nga importante ang pagbinuligay kag pagtu-o kay Sr. Sto. Niño.
Suno sa iya, yara gid ang bulig ni Sr. Sto. Niño humalin sang nagsugod sila sa pagplano tubtob sa competition.
Dugang pa niya, magapatigayon sila sang meeting pagkatapos sini kag magpasalamat sa tanan nga tawo nga yara sa likod sang ila kadalag-an.
