Mas nagahilapit pa ang 21-time Grand Slam champion nga si Novak Djokovic nga makuha liwat ang kampyeonato sa Australian Open.
Ini matapos iya ginlutos ang Australian-Spanish tennis star nga si Alex de Minaur sa straight sets.
Abante na si Djokovic sa quarterfinals kun sa diin atubangon sini ang No. 5 seed nga si Andrey Rublev sang Russia kag kinahanglan nga magdaog agud makakuha siya sang pwesto sa semifinals.
Si Djokovic nga amo anay ang world number 1 sa tennis ang wala nakaagi lutos sa Australian Open halin sang 2018 apang wala siya nakahampang sang nagligad nga tuig bangud gin-deport siya sa amo nga pungsod bangud sa pagpamalibad nga magpabakuna.
Magluwas kay Rublev nga atubangon ni Djokovic sa quarter-final stage, yara pa si Stefanos Tsitsipas sang Greece nga amo ang nabilin nga player nga yara sa top-10 seeds kag nagapabilin pa sa tournament.
Matandaan nga una na nag-exit sa amo nga hampang si 2022 champion Rafael Nadal. ##
