ILOILO CITY – Nagsaka ang kaso sang dengue sa probinsya sang Iloilo sa una nga tatlo ka semana sang tuig.
Sa data nagikan sa Provincial Health Office Provincial Epidemiology and Surveillance Unit, as of January 21, 2023, ang kaso sang dengue sa bilog nga probinsya ang nagdangat sa 54.
Sa amo man nga period sang nagligad nga tuig, ang probinsya ang naka-record sang 30 gid lamang ka kaso.
Ang banwa sang Estancia ang may pinakamadamo nga kaso kun sa diin, nagdangat ini sa lima.
Ang mga banwa naman sang Cabatuan, Ajuy, Barotac Nuevo, kag Pototan ang may yara sang tag-lima; ang Oton kag Alimodian nga may tag-tatlo; tag-duha sa Balasan, Carles, Concepcion, San Dionisio, Tigbauan, Janiuay, Passi City, Badiangan, Dueñas, kag San Miguel samtang tag-isa naman sa Banate, Batad, Calinog, Dumangas, Lambunao, Pavia, kag Santa Barbara.
Kalabanan sa mga pasyente ang naga-edad isa tubtob 10 ka tuig nga nagabug-os sang 50 porsyento sang kabilugan nga kaso.
Sa interview sang Bombo Radyo kay Dr. Maria Soccoro Quiñon, pinuno sang Iloilo Provincial Health Office, iya ginpahayag nga nakapanagtag na ang probinsya sang dengue test kits sa mga rural health units kag mga ospital.
Ginpahanumdom man sini ang publiko nga sundon ang 4s Kontra Dengue nga amo ang search and destroy mosquito-breeding sites, magpatuman sang self-protection measures, seek early consultation, kag support responsible fogging/spraying.
Importante man suno sa natungdan nga mag-inom sang madamo nga tubig kag magkaon sang pagkaon nga manggaranon sa vitamin C.
