ILOILO CITY – Siraduhan ang pila ka mga dalanon sa palibot sang Jaro Plaza sa Sabado, Enero 28, alas-tres sa hapon.
Ini agud nga maghatag sang ligwa sa patigayunon nga Jaro Fiesta Grand Parade nga pasakupan sang nagkalain-lain nga sektor kag mga kandidata sang Miss Jaro 2023.
Sa interview sang Bombo Radyo kay Mr. Jeck Conlu, pinuno sang Public Safety and Transportation and Management Office, iya ginpahayag nga indi man magdugay ang amo nga parada bangud nga manubo lamang ang ruta.
Magasugod ini sa Jaro Plaza, lusot sa Libertad St., Ma. Cristina, Jaro, lusot sa Fajardo, Jaro, balik sa Jaro Plaza, diretso sa Commission Civil St., Jaro, padulong sa E. Lopez, St. balik na sa Jaro Plaza.
Bangud sini, ang mga depampasahero nga mga salakyan nga nagikan sa Jaro padulong sa Iloilo City Proper ang maga-agi sa Fajardo, Jaro, lusot sa El-98, Jaro, diretso sa Taft North, Mandurriao kag maga-agi sa service road padulong sa corner sang Jalandoni kag Diversion padulong sa Magsaysay, La Paz, diretso sa Luna, La Paz kag balik na sa orihinal nga ruta.
Kun padulong naman sa Jaro, ang mga depampasahero nga salakyan ang maga-agi sa Javellana Road, lusot sa Ledesco Village, Del Pilar- Benedicto, lusot sa taytay sa Barangay Simon kag balik na sa orihinal nga ruta.
Ang mga public utility vehicle nga nagabyahe Leganes ang maga-agi sa Maria Cristina, Jaro lusot sa Fajardo, Jaro kag El-98, padulong sa Taft North, Mandurriao kag balik na sa orihinal nga ruta.
Suno pa kay Conlu, pagkatapos sini, wala na sang gin-schedule nga road closure sa kapyestahan ni Nuestra Señora dela Candelaria subong nga tuig.
