ILOILO CITY – Hugot nga ginpanginwala sang tricycle driver nga isa sa mga nadakpan sa drug buy-bust operation nga may kahilabtanan ini sa nagakatabo nga illegal activities sa Barangay Bakhaw, Mandurriao, Iloilo City.
Sa interview sang Bombo Radyo kay Manuel Jones Señolay, 31, residente sang Zone 5, Boulevard, Molo, Iloilo City, iya ginpahayag nga inosente siya kag nagpadulong lamang sa lugar bangud nga may gindul-ong nga pasahero.
Suno sa iya, ginpapondo siya sang operatiba kag ginhambalan nga magtinir lamang bangud nga may ma-istorya man sa iya.
Gindugang pa niya nga ginsapoti siya kag ginkuha ang bag nga may unod nga kwarta.
Nakahanda man ini nga magpaidalom sa drug test agud nga mapamatud-an niya nga inosente siya kag wala gid naga-intra sa illegal drug activities.
Sang una, nagabolante siya sang mga accessories sang cellphone kag wala pa isa ka tuig nga nagabyahe sang tricycle.
