ILOILO CITY – Magapakig-angot si Kabataan Party-list Representative Raoul Daniel Manuel sa iban nga mga Ilonggo lawmakers may kaangtanan sa gin-file sini nga resolution agud nga magpatigayon sang legislative inquiry sa Kamara sa kontrobersyal nga mga flyover sa Iloilo.
Kahapon, sa House Resolution 721, nasaad ang plano nga pagpatigayon sang legislative inquiry sa pagpatukod sang depektibo kag atrasado nga P680 million nga Ungka flyover project kag P560-million nga Aganan flyover.
Gin-call out man sa resolution ang atrasado nga pagtapos sang Aganan flyover nga nagatuga sang problema sa trapiko.
Kaupod ni Manuel nga amo ang principal author sang resolution amo sanday Gabriela Womens Partylist Rep. Arlene Brosas kag ACT Teachers Partylist Rep. France Castro.
Sa interview sang Bombo Radyo kay Representative Manuel, iya ginpahayag nga ipadala niya ang kopya sa iban nga mamalidha sa Iloilo agud makit-an nila ang kaundan sini.
Ginpahayag sini nga dapat nga masabat ang tanan nga mga palamangkutanon may kaangtanan sa sini nga mga flyover.
Ang sunod nga proseso suno kay Manuel amo nga basahon ini sa masunod nga session upod ang iban nga mga hagna kag diri na mahibaluan kun sa diin nga komitiba i-refer ang nasambit nga resolution.
Suno pa kay Manuel, ang ini nga resolution ang isa sa pamaagi agud nga mapasiguro nga indi na magdugay pa ang pag-antus sang mga Ilonggo.
Paagi sini nga tikang, nagalaum ang kongresista nga pormal nga ma-istoryahan ang mga depekto sang pagtukod sang duha ka mga flyover.
Enero 7 sang nagpatigayon si Manuel sang ocular inspection sa kontrobersyal nga Ungka Flyover.
