ILOILO CITY – Arestado ang tatlo ka mga durugista matapos ginserbehan sang search warrant sang Leon Municipal Police Station upod sang 1st Iloilo Provincial Mobile Force Company kag Provincial Drug Enforcement Unit sa Sitio Lanag, Barangay Isian Norte, Leon.
Ang mga nadakpan amo sanday Bryan Calanuga, 38, napreso na sang 10 ka tuig bangud sang kaso may kaangtanan sa iligal nga droga; Richard Cabarles, 38; kag Jefferson Calumay, 43, lunsay mga residente sang nasambit nga lugar.
Ang tatlo ka mga durugista ang nakuhaan sang 17 ka heat-sealed transparent plastic sachet nga may sulod nga suspected shabu, duha ka putos sang dahon sang marijuana nga nasulod sa foil, isa ka putos sang dahon sang marijuana nga nasulod sa papel, isa ka revolver nga may lima ka bala, kag isa ka home-made shotgun (pistolized break-type) nga may 10 ka mga bala.
Sa interview sang Bombo Radyo kay Police Captain Melchor Tolentino, hepe sang Leon Municipal Police Station, iya ginpahayag nga diri sa Barangay Bakhaw, Mandurriao ginakuha ang suplay sang droga.
Sa subong, preso na sa Leon Philippine National Police Custodial Facility ang tatlo.
