ILOILO CITY – Ginbawian na sang kabuhi ang isa sa mga naulamid sa pag-arado sang isa ka bus nga may byahe nga Tapaz, Capiz-Iloilo City and vice versa sa Janiuay, Iloilo.
Ang napatay amo si Christian Alutaya, 23, residente sang Barangay Matag-ub sang nasambit nga banwa kag driver sang angkar-angkar.
Si Alutaya ang nagatrabaho bilang delivery boy sang mineral water.
Sa interview sang Bombo Radyo kay Police Staff Sgt. Eddie Roncal, imbestigador sang Janiuay Municipal Police Station, iya ginpahayag nga nag-angkon sang patas nga pilas sa ulo si Alutaya nga amo ang gintunaan sang iya kamatayon.
Samtang sa 12 ka mga pilason, duha na lang ang nagapabilin sa ospital.
Ang driver naman sang ceres bus nga si Jay-R Yco, sang Ajuy, Iloilo ang nakagwa na sa presuhan matapos naglapas na ang reglementary period.
