ILOILO CITY – Ginbawian na sang kabuhi ang lalaki nga na-side swipe sang Ceres bus sa Barangay Buyu-an, Tigbauan, Iloilo.
Ang driver sang motorsiklo amo si Franklin Sumulong, 36, residente sang Barangay Calampitao, Guimbal, Iloilo.
Ang driver naman sang bus nga may byahe Aklan-Iloilo City via Caticlan amo si Noel Luis Valdipañas, 46, residente sang Barangay Calala, Hamtic, Antique.
Sa interview sang Bombo Radyo kay Police Captain Mary Jane Panes, hepe sang Tigbauan Municipal Police Station, iya ginpahayag nga nasag-iran sang bus ang motorsiklo rason nga nagbunggo ang mga ini sa konkreto nga kudal.
Natumba ang motorsiklo nga ginasakyan sang lalaki kag naghamyangon ini sa kalsada.
Dugang pa ni Panes, may suksok man nga helmet ang driver sang motorsiklo.
