ILOILO CITY – Ginbasura sang Sangguniang Panlungsod ang ginhingyo nga Resolution of No Objection sang Iloilo Sportsmen, Inc. agud nga makapatigayon sang 7-cock derby sa Iloilo Coliseum kadungan sang kapyestahan ni Nuestra Señora dela Candelaria.
Ang Resolution of No Objection ang kinahanglan agud nga mahatagan sang permit ni Iloilo City Mayor Jerry Treñas ang derby nga hiwaton kuntani sa Enero 31 tubtob sa Pebrero 2, 2023.
Sa ginpatigayon nga special session sang Iloilo City Council, ginduso ni opposition councilor Plaridel Nava nga ibasura ang amo nga hingyo.
Ini bangud nga ang Enero 31 amo ang katapusan nga adlaw sang registration para sa Barangay kag Sangguniang Kabataan Election sa bulan sang Oktubre.
Base sa Presidential Decree No. 449 nga Cockfighting Law of 1974, indi mahimo nga mapatigayon sang bulang sa Rizal Day, Philippine Independence Day, National Heroes Day, Holy Thursday, Good Friday, election ukon referendum day kag sa tion sang registration days para sa amo nga election ukon referendum.
Wala naman sang nag-abstain ukon nag-object nga myembro sang city council.
Sa interview sang Bombo Radyo kay Iloilo City Councilor Romel Duron, chairman sang Committee on Games and Amusement, iya ginpahayag nga ginkakibot niya ang tuman ka dasig nga desisyon sang konseho.
Mapaathag pa ini kuntani apang wala na nadayon bangud sa pagduso ni Nava nga ibasura ini.
Gin-athag niya nga wala man naglain ang iya buot sa resulta sang special session.
Apisar sini, pahayag ni Duron, mahimo pa nga makasulat ang Iloilo Sportsmen, Inc. sa syudad agud nga maghingyo sang konsiderasyon.
Nahibaluan nga ang derby ang masami nga ginapatigayon sa tagsa ka kapyestahan sang Jaro.
